MIN PERE NOEL
Paroles de Isaïe LAMPIN
Musique de Simon COLLIEZ
Des juets, au matin, pour nous,i n' avot pas
Inn' oranche, inn' quéniole, inn' barre ed' chocolat
Même bien souvint, l' carotte qu' in avot préparée
Là, dins l' fond d' nou bottine, all' étot cor' restée.
Car il étot tout seu dins l' temps nou Père Noël
Pour li faire dins inn' nuit, inn' tournée sans parel
Avec sin vieux baudet, comme fidèle compagnon
Sin panier à sin dos, et pis sin long bâton.
I m' arrife cor' à mi, même après tant d' années,
Comme pour un contint' mint d' arvir min coeur sauter,
D' y r' croire comme ches infants, d' aimer min Père Noël
Qui restera pour mi sur' mint l' fête el' pus belle.
Comme in le fait tertous dins ches grands évén' mints,
El' nature all' mettot sin pus bel habil' mint
Ed' sin pus blanc mantiau, là par terre étindu,
Comme un vrai tapis d' ouate arcouvrant tout’s ches rues.
Et le vint d' un seul coup, i s' mettot à courir,
Sifflant dins ches serrures, poussant des longs soupirs,
Hurlant pa' d' zous ches portes, faijant corner ches feux
Cotint comme in infant qui vient d' gagner au jeu.
Et ches apes dénudés, tout plein d' giffe ar'vêtus,
Parels à des gâtiaux qu' in a mi l' chuque ed' su,
I z' allongeutent leus bras, là, bien hiaut vers el' ciel,
Comme pour eux applaudir el' pus grante des nouvelles.
In n' allot pas dehors pour nous ravauder l' neiche:
In restot bien au caud pour nous préparer l' crèche,
Placher ch' petit Jésus, juste aux pieds d' ech baudet
Pour qu' i peuche, de s' n' haleine, bien vite el' récauffer.
Même ech cat, l' journée là, in l' véyot pas sortir;
S' frottant su ches bottines, comme pour les faire arluire
I restot là planté par devant l' queminée,
Pour attinte avec nous, el pus lonque des soirées.
El souper i durot un p' tit peu pus longtemps,
Sans chichis, sans manières, sans même nou boudin blanc,
Souvint pour nous finir, el pus biau d' ches desserts:
Inn' belle flamique dorée, dins l' pus grante des tourtières.
Sur el platine du feu, comme eux pouvoir juer,
Ches marrons tout craqu' lés, i s' metteutent à danser,
Répandant l' sintimint à travers tout l' maison,
Aussi biau qu' in Provence el sont tous ches santons.
Et les cloques des églisses, i s' mettotent à sonner,
Es buttant l' inn' dins l' aute, comme pour es récauffer,
Guidant nou Père Noël, perché su sin nuache,
S' in allant dins l' frodure pour sin pus long voyache.
Et me v' là aujourd' hui, cinquante années in plus.
Des Père Noël, à ch' teur, in in vot plein ches rues,
A l' télé, dins l' gazette, dins ches grands magasins,
S' mettant su ches photos avec tous nos gamins.
Et pourtant in vot cor, sur el bord d' un trottoir,
Un infant suppliant, si trisse dins sin regard,
Cachant après ch' l' étoile qui luit pour li dins l' ciel,
Car il a drot aussi à sin tiot Père Noël.
Si tous ches Père Noël pouveutent s' donner la main,
Si i pouvot l' nuit là oublier sin chagrin,
Serrer su sin p' tit coeur un p' tit rien, un juet,
Pour qu’au moins sin malheur seuche moins lourd à porter.