LA COURSE AUX CADDIES
Paroles de Bertrand COCQ
Musique de Simon COLLIEZ
Pour la plupart des gins dès la fin de l' semaine
In r' comminchant l' boulot in n' a qu' einne chose in tête
Ch' est chu qu' on va bien faire dès qu' arrivera l' week-end
Et bin pour mi mes gins faut pas qu' je m' casse la tête
M' femme alle s' occupe d' tout et dès l' vendredi soir
Sitôt que j' passe l' porte in rentrant du boulot
L' liste d' commissions alle m' attind sur ch' l' armoire
Cachez pas après m' femme alle est d' jà dins ch' l' auto
REFRAIN:
M' journée d' traval à peine finie
Qui ch' est qu' arfait l' course aux caddies
Pour pas rater einne promotion
Au pas d' course dins tous ches rayons
Plus que ch' est bieau et moins que ch' est kaire
Qui ch' est qui rate pas einne affaire
Ouais mais à l' caisse quand faut payer
Qui ch' est qui sort sin porte-monnaie
Ch' est toudis Loulou ch' est toudis Lili
Ch' est toudis Louis
Ch’est toudis Loulou ch’est toudis Lili
Ch’est toudis Louis
Quand j' arrife sur ch' parking comme i a pas gramint d' plache
J' deschinds madame à l' porte et mi j' cache à m' garer
L' jour des promotions i faut vir l' dallache
J' fais bien plus d' cinq cent mètres avant d' avoir trouvé
J' cueurs ind' sous de l' pleufe quand j' arrife j' sus noyè
Mais elle est si pressée qu' alle est déjà partie
Et quand enfin j' l' artreufe je m' fais core ingueulé
Cha r' est pour mi l' averse j' ai oublié ch' caddy
(au refrain)
Je m' demanderai longtemps pourquoi qu' alle fait einne liste
Vu qu' les trois quarts du temps alle l' oublie à l' maison
Faut l' vir dins ch' magasin mi derrière j' suis la piste
J' sus obligé d' courir pour pas l' perte dins ch' rayon
I faut qu' j' attrape l' boîte qui est su l' planque du haut
Ou bin je m' plie in deux pour lire einne étiquette
Pour aller à ches loques faut que j' cueurs comme un sot
D' vant ches boutelles alle passe raite comme einne arbalête
(au refrain)
Sitôt que ch' magasin vind quetcosse d' nouvieau
Ch' est plus fort qu' elle aussi vite alle va l' acater
Alle ravisse pas alle jette alle rimplit min carriot
D' apéros sans alcool et d' fromage allégé
Quand in passe à la caisse alors là ch'est l' bouquet
J' fais un chèque i n' a pour la mitan de m' quinzaine
Je n' vais pas assez vite pour rimplir ches sachets
Alle dit: J' ai pas grand cosse in arvient l' semaine prochaine
(au refrain)