EM’ FEMME J’L’ARCONNOS PUS
Paroles de Jean-Marie CERF
Musique de Simon COLLIEZ
Quand j’étos jonnes marié et qu’alle voulot m’app’ler,
A’m dijot des tiots mots qui m’faijot’ rigoler :
J’étos sin canarien, sin bradé, sin pouchin,
Ou bin es n’épinoque, sin coulon sin lapin.
Achteure minme min prénom, j’cros qu’alle l’a oublié :
Alle connot pus qu’un mot : pour m’app’ler alle fait « hé !
Quand j’étos jonnes marié, l’jour de m’anniversaire
Chétot un évèn’mint, alle savot pas quoi m’faire.
Aujourd’hui ch’est fini, s’mémoire li fait défaut.
Alle ne me l’souhaite pus, J’n’ai pu drot au gatiau.
Si jamais j’li rappelle que m’fête ch’étot hier,
A’m’dit : « t’n’anniversaire ?ch’tot d’j’à l’année dernière ! »
REFRAIN
Em’ femme j’l’arconnos pus
Elle qu’i’étot si gentille
Ch’est vrai quand é j’l’ai connus
Alle étot même un peu fragile
Em’femme j’l’arconnos pus
Quand j’dis cha à sin père
I m’dis ravise me min fuit
Té vos té pas l’seul sur la terre
Quand j’étos jonnes marié, si je m’tordos min pied
Tout d’suite a’s’tracassot : »t’as d’mau, min tiot poulet ? »
Si achteure i m’arrife parel mésavinture,
A’m’laiche là su l’quémint, n’s’artourne pas de m’foulure ;
I li prind un fou rire, alle piaule tout comme ein’ glaine :
« Té n’tiens vraimint pus d’bout, té passe tin temps su l’dainne » !
(au refrain)
Quand j’étos jonne marié, in n’dormot pas gramin :
Ej n’in dirai pas d’pus, j’sus sûr qu’tout l’monne comprind !
Aujoud’hui alle s’indort, sans même em’dire bonsoir ;
Et si j’veux l’pochiner, à m’fusile de s’n’oeul noir :
« T’as pas bintôt fini ed faire tes simagrées ?
Si té m’laiches pas dormir ej vas t’faire tin paquet ! »
((au refrain)