MIN BIEAU TIT PERE
Paroles de Jean-Marie LEFEVRE
Musique de Simon COLLIEZ
Quand il arrive tout doux tout miel
Faut vire c’qu’il a comme matériel
Tout l’monte y’est in admiration
Y’a s’photo partout dins l’maison
Et si i fait des vocalises
I faut tout d’suite qu’in s’mobilise
Ch’est pas einne vedette de l’canchon
Ch’est tout bêt’mint min tiot garchon
Quand tout l’monte l’a pris dins ses bras
S’maman s’mamie et sin papa
Alors in s’dit peut ête que ti
Te voudros bien el printe aussi
Et là i t’fait des grands sourires
Et y’a tin p’tit coeur qui chavire
Et pis te sins l’ieau caute couler
Ch’est li qu’i’est in train ed t’arroser
REFRAIN :
Et mi j’l’appelle min bieau tit père
I’arsanne à sin père et à s’mère
Avec des yux toudis rieurs
Et einne pieau douche qui sint les fleurs
Un tiot fiston qui vient au monte
Ch’est un bonheur qui vous innonde
Et in oublie toutes ses misères
El jour qu’i’arrive un bieau tit père
Min copain qui m’fait inrager
M’dit quoi qu’cha fait d’dev’nir pépé
Ch’est vraimint extraordinaire
Soudain t’as pus les pieds sur terre
Quand te l’vos là dins sin berceau
Tin coeur i s’serre tel’mint qu’i’est bieau
Te t’dis qu’ch’est tin fiu qui l’a fait
Et là cha i’est i faut qu’te brais
(au refrain)