Tout duch'mint

TOUT DUCH’MINT Paroles de Jean-Marie CERF Musique de Simon COLLIEZ Tout duch’mint hésitant sur ses tiotes gambettes Monsieur Bébé comminche à faire ses premiers pas Et malgrè ses culbutes amiteux fait risette A s’nounou qui l’incourache in tindant ses bras L’soir venu i s’indort flapi mais contint d’li Su les g’noux de s’maman qui li cante l’tiot Quinquin Et ch’est ainsi mes gins qu’in prind L’quémin d’la vie Tout duch’mint tout duch’mint Tout duch’mint tout duch’mint Tout duch’mint arrive l’ ache ed rintrer à l’école Et tous les soirs ch’l’infant apprindra ses leçons Mais un bieau jour v’là que d’sin nid ch’l’osiau s’invole In a seize ans alors in est un grand garchon In s’prind à rêver in s’sintant capape d’aimer Et l’cœur i bat pour eune tiote dont in a l’béguin Sans i pinser mes gins un jone coupe va s’loïer Tout duch’mint tout duch’mint Tout duch’mint tout duch’mint Tout duch’mint comme tout l’monte in va fonder s’famille Comme tout l’monte in aura des momints d’émotion Quand un bieau gros garchon pis eune mignonne tiote fille Chacun leu tour apport’ront de l’joie dins l’maison Autour ed nous résonnent leus éclats d’rire leus cris In est heureux et in oublie ches tiots tourmints Mais in n’vot pas mes gins nos ch’veux devenir gris Tout duch’mint tout duch’mint Tout duch’mint tout duch’mint Tout duch’mint passent momints d’joie et momints d’misère L’front s’est ridé l’restant d’nos ch’veux est dev’nu blanc Un tiot bonhomme plein d’vie qui vous appelle grand père Saute in criant hue dada su vous g’noux trannants Dins not’ viux nid d’amour el temps n’est pus si bieau In a sin dos voûté in marche difficil’mint Et ch’est ainsi mes gins qu’in s’prépare au grand saut Tout duch’mint tout duch’mint Tout duch’mint tout duch’mint Tout duch’mint tout duch’mint Tout duch’mint tout duch’mint