MES GALOCHES ED L'AN QUARANTE
Paroles de Jean Marie CERF
Musique de Simon COLLIEZ
O s'rapp'lez qu'in quarante in étot privé d'tout
El cuir il étot rare y'avont pont gramint d'sous
Adon est arvénue ein' mote ed l'ancien temps
In arfait des galoches surtout pour chés éfants
L'dézeur i'étot in cuir l'semelle étot in bos
El seul pair eq j'ai eue rin qu'din parler j'l'arvos
Jé l'z'ai traînées deux ans fallot les faire durer
Et quand i féjot frod m'ont bin cauffé les pieds
Ej dos quand même vous dire qu'pindant l'premier hiver
Avec deux pointures d'pus m'z'ortels n'manquot' pont d'air
Et ch'est pour impêcher mes cauchettes de s'troer
Que l'bout ed mes galoches étot bourré d'papier
REFRAIN
Mes galoches ed l'an quarante
Ch'est pétète pont grand cosse
Mais mes galoches ed l'anquarante
Ch't'in bieau souv'nir ed gosse
Pour el deuzième hiver al' z'étot' à m'pointure
Et j'ai cor affronté el neiche et pis l'frodure
Patouflé dins chés flaques et l'bidoulle d'chés voïettes
Gliché d'sus ch'marais g'lé ed bout ou à croupette
Faut dire qu'avec chés daches tapissant chés semelles
Ein' glichate à ch'temps là ch'tot ein' joie sans parelle
Je m'ramintuve aussi el bruit eq cha féjot
Quand j'couros su l'pavé in m'prénant pour un g'vau
Cha décrottot chés daches imbernaqué d'bidoulle
Passe que l'bidoulle ram'née cha métot m'mère in boule
Des fos al' graissot ch'cuir avec ein' couane ed lard
Pour n'pont brader l'chirache qui étot putôt rare
au refrain