L' TAILLETTE
Paroles de Bertrand COCQ
Musique de Simon COLLIEZ
Ch' est un ptit bout d' feralle
Rond perché au milieu
Avec un numéro tout bête 232
Que j' ai artrouvé hier in cachant dins ch' tiroir
Et qui d' un seul momint a ralleumé m' mémoire
J' t' arvos i a jusse vingt ans ch' étot la fin d' l' hiver
T' es v' nu nous dire à r' voir pis t' as imbrassé m' mère
T' as mis t' grosse canadienne d' sus t' n' épaule et' musette
Pis t' es parti à l' fosse in fumant t' cigarette
Je n' devos pus t' arvir ; à quatre heures au matin
I a eu un grand coup d' mine et pis après pus rien
I avot un tué in plus j' avos un père in moins
Ch' garte i est vénu nous l' dire d' bonne heure au matin
Oh i a pas eu d' manière i a pas eu d' bieau discours
Pas eu d' miniss' brayant d' sus l' catastrophe du jour
Quand i a jusse fauqu' un tué un mineur mort tout seu
Ch' est pas einne catastrophe ch' est tout juste malheureux
Nan i a eu jusse qu' einne veufe et pis deux orphelins
Et ch' cercueul in bos blanc avec min père ed' dins
Et ch' est sus ch' carreau d' fosse in sortant d' l' infirm' rie
Qu' un homme s' est avinché et v' nu au devant d' mi
I n' savot pas commint faire alors i a inl' vé s' casquette
Et m' a dit " Tiens min loute garte-le ch' étot s' taillette"
Ch' est un ptit bout d' feralle rond perché au milieu
Pas l' médalle du traval mais pour mi ch' est précieux