L' HISTOIRE DU PAIN D' ALOUETTE
Paroles de Jean CEENAEME
Musique de Simon COLLIEZ
J' avos cinq ou six ans peut ête
A l' époque ed l' occupation
Min père m' ram' not l' pain d' alouette
Pour que j' souff' moins des privations
L' pain d' alouette faut que j' vous l' dise
Ch' étot einne tartine arséquée
Qu' i avot un tiot goût d' pain d' épices
Qu' min père i prél' vot d' sin briquet
Aussi quand i rintrot de l' mine
Bien mate d' avoir fait du carbon
Dins chel' malette comme einne fouine
J' allos récupérer ch' crouton
Et demander de m' voix fluette
Tout in bavant d' sus min ctron
Pourquoi app' ler l' pain d' alouette
Chel' tartine qui m' semblot si bon
Alors in s' essuyant s' moustache
Barbouillée d' soupe tout alintour
I m' racontot d' un ton plus grave
El' plus belle des histoires d' amour
L' pain d' alouette min tiot bonhomme
Il est fabriqué pendant l' nuit
Alors que tous les gosses i dorment
Rêvant aux anges du paradis
Tandis que dins l' fin fond de l' mine
Accroupi pendant sin briquet
L' mineur in grignotant s' tartine
Fait querre des miettes intre ses pieds
Alors toutes les souris de l' fosse
Dins les bowettes et les cassis
S' in vont par les creux et les boches
Ramasser l' pain qu' in leur a mis
Après avoir nourri leus mioches
Blottis dins leu tiot nid douillet
Bien à l' abri d' tous les coups d' pioches
Ch' pain si bon i vont l' fabriquer
Ainsi l' crouton noir de l' malette
Qui t' régale et qui t' sen' si bon
J' l' ai trouvé intouré d' équettes
Ch' étot d' part à ti min garchon
J' avos cinq ou six ans peut-ête
Souvint min père i m' racontot
L' histoire du bon pain d' alouette
Que tous les jours i m' raménot
Asteur qu' les années ont passées
Ej m' in rinds compte mieux que personne
Que l' bout d' pain souvint armonté
A fait de moi papa un homme