FAIT D’HIVER
Paroles de Jean-Marie CERF
Musique de Simon COLLIEZ
S’n’usine alle a freumé i’a té mis au chômache
A chinquante ans passés i’a pas r’treuvé d’ouvrache
I’a t’nu l’coup un momint menant inne vie d’bohème
Mais noïé dins ses dettes i’a quitté s’n’H.L.M
D’pis ch’temps-là i’est à l’rue aveuc pour tout barda
Sin bonnet à pompon et s’vieil’ capote ed drap
I n’imbête pas chés gins i ravisse l’va et vient
Tous les jours à l’même plache assis tout près d’sin quien (bis)
I tient un bout d’carton ramassé dins ch’gulot
D’sus i’a quat’ mots d’écrits : sans abri ,sans boulot.
Quand i r’cheut inne tiote pièche ed chés gins in balate
Es tiête alle fait merci tout comme un automate
Si l’peu d’sous qu’in li donne cha li permet d’minger
I n’peut pas faire d’extra i’est rar’mint rassasié
Ch’est au bistrot du coin qu’i s’fait un molé prope
Quand i peut y rintrer pour s’y payer inne chope (bis)
N’voulant pas s’séparer ed sin braf’ épagneul
El soir i s’présinte pas à l’porte du cent’ d’accueul
Ch’est à la gare routière qu’i vient s’met’ à l’abri
In boule sur un banc d’pierre comme un loir dins sin nid
L’nuit chi ch’étot prévu l’hiver a tapé fort
Etonnés à sept heures ed vire qu’i dormot cor
Chés boueux l’ont s’coué i n’a pas dit un mot
Sin quien i’o résisté li i’étot mort ed frod