LES BAISSES
Paroles de Bertrand COCQ
Musique de Simon COLLIEZ
I’a l’baisse du nouvel an ed’ matante Aglaé
Qui s’a toudis pas core décidée à s’raser
Et i’a l’baisse des étrennes à mon Mononque Eustache
Qui décatèle vous nez avec es’ grosse moustache
I’a l’baisse de m’pétite nièche j’ai pas kaire qu’alle m’imbrasse
Pasqu’avint d’l’imbrasser i li faut mouquer s’nasse
I’a les baisses de m’belle mère ch’est pas qu’cha m’plait vraimint
Mais i’a des circonstances j’peux pas faire autremint
I’a les baisses je n’ai peur de m’cousine Marinette
Elle alle cache à tous prix à me faire eune bouquette
Mais c’qui m’dérinche el’ plus ch’est que s’n’homme Jean-Michel
Li aussi i fait tout pour m’rouler eune gamelle
I’a l’baisse de Monsieur l’Maire qui m’a r’mis eune médale
J’voudros pas ête vulgaire mais m’sieur l’Maire i sint l’al
Mi j’aros eu si kaire imbrasser s’secrétaire
« Je me n’occupe mi-même » qui m’a répondu ch’Maire
REFRAIN
I n’a qui claquent fort i n’a qui font pas d’bruit
I’n’a pour dire à r’voir i n’a pour dire merci
Chelles qu’in fait dins les coins ou bin derrière l’églisse
Des qu’in fait juste avant ed’ faire eune grosse bêtisse
Des gourmantes des fougueusses des collantes des timites
Des qu’in s’muche pour les faire des grosses ou des pétites
Des qui durent si longtemps qu’in arprind pus s’n’haleine
Pis des à peine finies qu’in voudrot bien qu’ch’arprenne
I’a l’baisse d’anniversaire tous z’ans à l’même époque
De tin bieau frère qui a eune carure d’épinoque
Qui dit « pour t’imbrasser j’va passer par derrière
Té c’minches à avoir un vinte comme un tonnieau d’bière
I’a des baisses qu’in écrit sur un tas d’cartes postales
Qu’in invot à des gins qui s’en foutent pas mal
Ch’copain à qui in dit « t’imbrass’ras t’femme pour mi »
Et qui répond « cha fait cinq ans qu’alle est partie »
Au refrain
Pis enfin i’a les baisses que j’sus pas mate ed’ faire
Chelles qui veulent dire min loute « ej’ cros bien que j’t’ai kaire
Que j’t’aurai kaire longtemps si long qu’in s’ra à deux
J’f’rai autant d’baisses que j’peux j’f’rai autant d’baisses que j’veux
Au refrain