QUAND L’TEMPS SERA VENU
Paroles de Bertrand COCQ
Musique de Simon COLLIEZ
Quand l’temps aura r’muché mes souvenirs d’enfance
D’un brouillard arrivé duch’mint sans s’annoncher
Quand les ans écoulés feront naître des absences
Que vous aurez l’pudeur de ne pas arléver
Alors j’vous apprindrai chu qu’vous savez déjà
J’vous dirai des affaires que j’vous ai dit cent fos
Je m’mettrai in colère pour l’mot qu’j’artrouvrai pas
Et vous m’direz « ch’est rien » et vous m’soufflerez ch’mot
Pis viendra vite el’temps faudra pas m’in vouloir
Dusque j’vous f’rai tout vire dusque j’vous ferai braire
Et même si aujourd’hui j’ai du mau à y croire
Vous n’s’rez pus dins m’paufe tiête qu’des figures étrangères
Alors vous m’ravis’rez sans trop vraimint comprinte
Chu qui peut bien s’passer dins m’n’esprit déringé
J’vous verrai sans vous vire parl’rai sans vous intinte
Et même quand j’serai là ch’est pas sûr que j’y s’rai
Vous vous d’mindrez si j’sus malheureux sans savoir
Ej’ vous férai damner vous voudrez pas l’admettre
Mais petit à petit viendra el’ désespoir
De n’pus ête arconnus de ne pas m’arconnaîte
Vous vous direz alors ch’est pas possipe mon Diu
Ch’est pas li qui peut devenir aussi mécant
Et vous aurez raison ch’ti que j’s’rai devenu
N’aura pus rien à vire avec ech’ti d’avant
Ch’ti qui’aura passé s’vie à avoir peur pour vous
Ch’ti qui aura souffert pour pas qu’vous souffriez
Ch’ti qui aura jamais cessé d’pinser à vous
Ch’ti là i’aura longtemps qui se s’ra in allé
Aussi quand viendra l’heure ed’ la séparation
Quand vous s’rez à bout d’forche quand j’vous aurai usés
Quand i vous faudra printe el’ fameuse décision
J’vais vous dire eune affaire qui va vous assister
Ch’ti qui vous a eu kaire bien plus que tout au monte
Ch’ti qui’aurot préféré avoir du mau pour vous
Qui s’rot mort pour vous sans hésiter eune seconte
Ch’est pus li aujourd’hui qu’vous avez devant vous
Ch’ti qu’vous avez connu i vous aurot d’mindé
D’y faire l’pus bieau cadeau que vous pouvez li faire
De printe bien soin d’vous de n’pas vous épuiser
Cha ch’est l’meilleux moyen d’y dire qu’vous l’avez kaire