EJ’CONNOS QUIQU’UN
Paroles de Guy DUBOIS
Musique de Simon COLLIEZ
Fallot- i pas que j’vache fuir min gardin
Carier tous ches sal’tés qui y’avot d’dins
Saquer sur min louchet comme un perdu
J’ai app’lé em femme et j’y’ai répondu
REFRAIN :
Ej’ connos quiqu’un qui va faire l’affaire
Pour si peu cha n’vaut point l’peine ed’ sin faire
Té n’vas pas ichi v’nir em’ tracasser
J’sais point m’y printe et j’vas core ête usé
Cha faijot deux mos qu’alle me churchinot
D’armette in peinture ech’ grand lanternau
Et in y étant l’porte de ch’cagibi
J’peux point j’ai les côtes in long qu’j’y ai dit
(au refrain)
Madame il i fallot eun’ belle pelouse
J’auros poussé l’tondeuse douze mos sur douze
Semer des paquets d’fleurs et n’n’arpiquer
J’m’ai sintu tout faibe et j’y’ai répliqué
(au refrain)
Tous les s’maines ch’est l’corvée d’ches commissions
Faut courir ichi s’querquer d’provisions
In est cholé pas d’plache dins ches parkines
J’min sors cor heureus’mint j’ai eun’ combine
(au refrain)
Hier au soir alle s’prom’not in quémijette
J’ai eu invie ed’ faire eun’ galipette
Comme v’là qu’je l’serros dins mes bras d’Hercule
Alle m’a ravisé et m’a dit arcule
Ej’ connos quiqu’un qui va faire l’affaire
Pour si peu cha n’vaut point l’peine ed’ sin faire
Té n’vas pas ichi v’nir et’ tracasser
Té sais pas t’y printe té vas cor ête usé