MIN PREMIER VOYACHE A L’ETRANGER
Paroles de Jean-Marie CERF
Musique de Simon COLLIEZ
J’viens d’rintrer d’un voyache et j’sus tout débousé
Ej’ n’ai eu qu’des innuis j’vas vous les raconter
J’tos à peine arrivé qu’einne pêquée d’gosses m’intoure
Voulant m’vinte des babioles i m’faigeotent des mamours
In m’avot bien prév’nu qu’fallot z’avoir à l’oeul
Mais j’n’y ai vu qu’du bleu i’ont pris min portefeul
REFRAIN :
Ch étot min premier voyache à l’étranger
Mais promis juré cha s’ra aussi l’dernier
Ch’étot min premier voyache à l’étranger
Mais promis juré cha s’ra aussi l’dernier
A l’soirée folklorique y’avot d’ches belles danseuses
I’n’a deux qui sont v’nues m’quèr pour faire l’clown avec eusses
Et pus qu’alles s’tortillotent et pus qu’je m’trémoussos
Pindant chelle danse du vinte ch’est fou ch’que j’arsintos
Mais vous n’allez pas m’croire em femme ed jalousie
Alle m’a laiché in plan et d’pis alle veut pus d’mi
(au refrain)
Arvenu à Orly m’tension alle a monté
I m’manquot einne valise ch’tot l’mienne j’l’auros parié
I’a fallu réclamer rimplir des tas d’machins
J’sus sûr qu’in m’la volée j’sus marqué par l’destin
Rintré sans portefeul sans femme et sans bagache
J’sus tell’mint contrarié j’ai peur qu’min cœur i lache
(au refrain)
Et pis ch’est pas fini car el lend’min matin
J’vas pour arquèr min tchien confié à un voisin
I m’dit tout artourné t’brave bête alle s’a sauvée
Un sauvache à moto il l’a écrabouillée
Quoi qu’j’ai fait au bon Dieu ej vous l’deminde mes gins
Pour qu’in huit jours ed temps i m’arrive tant d’pépins
(au refrain)