L’COULEUR
Paroles de Bertrand COCQ
Musique de Simon COLLIEZ
Té vos j’sais pas pourquoi mais j’t’ai plus querre qu’hier
L’nuit chi j’ai mal dormi j’ai busié artourné
Dins m’tête des tas d’idées ech’ matin j’sus pas fier
Mais j’ai quettecosse à t’dire et i faut m’acouter
I’a fort longtemps té sais que prenant l’main d’eune file
J’ai eu min cœur poché avec tant d’émotion
J’sus fier que té seuches là te l’dire ch’est difficile
Alors j’ai pris eune feule et j’ai pris min crayon
REFRAIN :
El couleur cha n’existe pas
Dins min cœur cha n’existe pas
J’voudros t’dire que les hommes n’ont pas gramint d’mémoire
Cheusses qui parlent aujourd’hui cheusses qui critent l’ pus fort
Sont sur’mint pas z’éfants d’cheussent qui ont fait l’histoire
Cha n’dot pas ête pour eux que tant d’gins i sont morts
J’voudros t’dire que j’sus là qui faut pas avoir peur
Qu’té peux compter sur mi que j’saurai t’protéger
Ch’est drôle qu’i n’na qui pinsent à t’app’ler « pétit beurr »
Mi j’ai invie de t’dire min p’tit café au lait
(au refrain)
Té vas grandir min nain et cha s’ra pas facile
Sur’mint core moins pour ti que pour les z’autes z’éfants
Té pins’ras moins à mi té d’viendras eune jone file
Mais mi j’pourrai jamais oublier min bout d’zan
I’ont ti vu tes grands yux tous cheusses qui parlent ainsi
I t’ont ti acouter avant d’dire ch’est mots là
N’leur réponds surtout pas té leur f’ros trop plaisi
Serre m’main n’aie pas peur et appelle me « papa »
Té vos j’sais pas pourquoi mais j’t’ai plus querre qu’hier
Té m’imbrasses in riant et j’ai bel à m’forcher
J’arrive pas à trouver l’mal que té pourros faire
J’arrive pas à pinser qu’t’arprésinte un danger
(au refrain)