MIN BIEAU-PERE
Paroles de Bertrand COCQ
Musique de Simon COLLIEZ
Quand i vient à m' maison min bieau-père i' in profite
Pour m' donner des consels des recettes et bien vite
In parle d' bricolage d' pêque et pis d' gardin
A l' intinte au monte y' a qu' li qui férot bien
I est persuadé qu' ch' est d' pis l' temps qu' i est pinsionné
Qu' ches molettes d' el fosse i ont arrêté d' tourner
Quand je l' ramène à s' maison avec m' n' auto
Je m' fais ingueuler parce que j' roule comme un sot
Mais l' jeudi quand i amène m' belle-mère au marché‚
I téléphone à l' météo d' vant s' in aller
Quand i pleut pas y' a rien qui pousse dins sin gardin
Quand i pleut cha déplaque sans quoi il irot bien
Si ch' vint i est d' Est i n' peut pas s' mer ch' est pas l' momint
Si ch' vint i est d' Ouest ch' est trop humite i est pris d' ses reins
I m' traite d' innochint si j' arpique sans tenir compte
Si l' lune est pleine si alle déchind ou si alle monte
Mais quand i vot min gardin tous les ans à l' ducasse
J' sus pas gêné d' y arriver m' terre alle est grasse
Et quand mes z' haricots i sont plus bieaux qu' les siens
Ch’est grâce à li ch’plan i v’not sur’mint d’sis gardin
REFRAIN:
Min bieau-père min bieau-père
Ch' est un maît' gardinier et un fin pêqueux
Min bieau-père min bieau-père
D' après li cha s' rot l' roi des bricoleux
Min bieau-père min bieau-père
A l' intinte parler y' a qu' li qui sait tout faire
Min bieau-père min bieau-père
Si cha continue i s' ra pire que m' belle-mère
Quand in va à l' pêque à deux j' fais bien attention
Faut pas que j' seuche à r' tard pour el printe à s' maison
Quand à quatre heures tapantes j' arrife sur ech boul' vard
I est déjà là assis sur l' bord de ch' trottoir
Au bout de l' journée d' pêque si i a plus d' pichons qu' mi
Faut l' intinte es' vanter i sait mieux pêquer qu' mi
Mais l' jour qu' i n' in prind pas in n' l' intind pus parler
I oublie même ed dire que j' n' ai plein min panier
El l' lend' main au café ses bras n' sont pas assez longs
Pour montrer ech brochet qu' i a arsaqué du fond
(au refrain)