IN N'A VRAIMINT NOTE DOSSE
Paroles de Bertrand COCQ
Musique de Simon COLLIEZ
Acoutez-nous mes gins , vous tous les journalistes,
Vous qui êtes si galaffes d’ ragots , d’rumeurs…
Acoutez rédacteurs , chroniqueurs , humoristes,
Psycholoques ou médecins, vous tous les professeurs.
Toudis prêts à nous plainte, toudis premiers à braire,
Vous qui n’avez pas d’mots assez noirs pour décrire,
Note vie si misérape, note vie comme un calvaire,
Note vie si peu inviape, note vie triste à mourir.
In va vous dire eune affaire
Qui devrot pas trop vous plaire
I faudrot comprinte quette cosse
In n’a vraimint note dosse
I a de l’ misère tout partout , in est d’accord avec cha ,
Mais pas plus ichi qu’ailleurs , oublie nous P.P.D.A
Sautez pas dins l’ premier TGV pour vénir ,
Au moindre faits divers , au premier bruit qui queure ,
In s’ débroulera sans vous , pas la peine d’ courir ,
Ch’est bien gentil à vous , merci du fond d’note cœur.
Si dins vote tiête incore, toudis les mêmes clichés,
Malgré tous nos efforts , berchent vous chervelle findue,
Si ch’est les mêmes décors,dins vou esprit bouché,
Qui vous font croire que l’ Nord est un pays perdu
In va vous dire eune affaire
Qui devrot pas trop vous plaire
I faudrot comprinte quette cosse
In n’a vraimint note dosse
Ch’est d’accord Evelyne Dhéliat, dins l’ Nord i fait jamais bieau
In te l’ deminte s’il te plaît , n’ parle pus d’nous din t’météo.
A ches gins haut plachés , sans imagination ,
Qui pour faire d’ l’audience , pour faire monter les scores
Gagner des spectateurs , ou bin les élections ,
Quand i n’ savent pus quoi dire , s’ mettent à parler du Nord.
Vous qui pindint d’ z’années n’avez douté d’arien ,
Qu’i avez pinsé pour nous ,décidé d’ nou destin,
In’n’a vraimint assez, in vous armercie bien,
A s’ t’heure faut nous laicher , la suite nous appartient.
In va vous dire eune affaire
Qui devrot pas trop vous plaire
I faudrot comprinte quette cosse
In n’a vraimint note dosse
Delarue in est d’accord, ichi in est malheureux
Si t’as du mau à tin cœur, va ailleurs , ch’est suremint mieux !
A cheusses qui pour faire rire ou s’ donner d’ l’ importance,
Pasqu’ i safent pus quoi dire , qu’ i sont à court d’ idées
Imitent note bieau langache , du haut d’ leur suffisance ,
Cheusses qu’ i sont nés baudet , et sont dev’nus bidet.
Si note lanque alle écorche , vous z’ orelles trop sensipes ,
Ch’est pourtant l’seule manière, qu’in a trouvé d’ vous dire,
Qu’in l’garde pas dins nous poche,cha n’ nous est pas possipe,
L’patois in l’a kaire ,il est pas prêt d’mourir.
In va vous dire eune affaire
Qui devrot pas trop vous plaire
I faudrot comprinte quette cosse
In n’a vraimint note dosse
Ch’est pas bieau d’ parler patois, in arviendra pas là d’sus
Si vous voulez pas l’ intinte , n’ nous interrogez pus.
In va vous dire eune affaire
Qui devrot pas trop vous plaire
I faudrot comprinte quette cosse
In n'a vrai mint note dosse