ARGRET
Paroles de Jean-Marie CERF
Musique de Simon COLLIEZ
Y’a pon d’cha bin lontemps pour es ravitailler
In allot dins ch’pat’lin in f’geant sin qu’min à pied
I faut dire equ dins l’temps y’avot d’tout dins ch’villache
Tout ch’qui fallot pour viv’ normal’mint fin bénache
Et ch’étot l’occasion pour chés gins de s’parler
D’raconter chés cacoules intindues dins ch’quartier
Comme ed bouque à orelle fort vite tout s’répétot
Final’mint chés nouvelles tout l’mon’ne les connaichot
A’cht’heur faut aller vite in queurt toudis pressé
Combin je n’intinds s’plaint d’pon vire el temps passer
Alors ch’est in auto qu’in fait chés commissions
Et in s’in va bin lon faire el plein d’provisions
REFRAIN
Pour rimplir sin panier cha s’fait pus comme avant
Et bin des viux argret’ ech l’épicier d’dins l’temps
De n’pus s’y rincontrer d’s’y parler j’treuv’ cha trisse
Chés gins i s’connotent pus et i d’vient’ égoistes
Ch’est dins z’hyper marqués qu’chés gins treuv’t leu bonheur
Faut vir el mon’ne la-d’dins et à n’importe quell’ heure
In intique in intasse in saque à chés rayons
In s’laiche souvint aller ed’vant chés promotions
In a écrit ein’ liste vite fait avant d’partir
Mais in n’a deux fos d’pusse au momint d’arsortir
Et bourlant dins z’allées aveuc ech cariot plein
Pou l’peu qu’ein’ reule al coinche in s’fait un tour ed reins
Comme in n’les connot pon in n’s’artourne pon d’chés gins
In peut ête là deux heures sans desserrer les dints
Pi i faut faire la queue pour tout mett’ su ch’tapis
Et deux tros mètes pus lon in r’plache tout dins ch’cadi
REFRAIN
Pour rimplir sin panier cha s’fait pus comme avant
Et bin des viux argrèt’ ech l’épicier d’dins l’temps
De n’pus s’y rincontrer d’s’y parler j’treuv’ cha trisse
Chés gins i s’connotent pus et i d’vient’ égoistes
Chés comme cha qu’dins ch’villache n’y’a pus d’animation
Ch’est p’têt’ comme cha aussi que comminche l’esclusion ?