MARIE BERLAFE
ET BATISSE LONGS Z’OCHES
Paroles de Jean-Marie CERF
Musique de Simon COLLIEZ
Marie Berlafe ch’est l’fimme alle a l’air ahurie
Aveuc ses gross’é loupes comme des bords ed pot d’nuit
Quand alle pousse des soupirs ch’est des vrais pets d’baudet
S’n’haleine tue chés mouques comme ein’bompe ed DDT
Alle a ein’ tiête comme deux mais ein’ chervelle ed puche
S’n’oeul gauche clignote à droite s’n’oeul drot jue à muche muche
Alle est sourte comme ein’ mule sin nez i quet dins s’bouque
Et si alle a l’niflète d’un cop d’lanque alle se mouque
Alle bafe comme un viux tchien quand i minche des croûtes sèques
Alle a ses loupes soilées tell’mint qu’alle les pourlèque
Ch’est ein’ perche à houblon qui marche in n’sait pon c’mint
Pace que quand alle s’in va in dirot qu’al arvient
REFRAIN
In dit qu’i vaut miux s’taire putôt que d’mal parler
Mais c’que j’ai dit mes gins ch’est la réalité
Mes voisins n’sont pon bieaux l’nature les a ratés
Vu qu’cha n’est pon d’leu faute faut pon n’in rigoler
In dit qu’i vaut miux s’taire putôt que d’mal parler
Mais c’qu’il a dit mes gins ch’est la réalité
Ses voisins n’sont pon bieaux l’nature les a ratés
Vu qu’cha n’est pon d’leu faute faut pon n’in rigoler
O nan nan O nan nan O nan nan faut pon n’in rigoler
O nan nan O nan nan O nan nan faut pon n’in rigoler
Li ch’est Batisse Longs z’oches i n’tient pon dins ses loques
I’est comme el queue d’min tchien quand i marche i berloque
Faut dire qu’i’a des mollets comme des bougeons d’caïelle
Et qu’ses bras sont musclés comme des queues ed païelle
Es tiête alle va d’travers mais il avale bin drot
S’figure couleur pieau d’pronne nous rinseinne su ch’qu’i bot
In veyant ses tros d’nez et l’forme ed sin minton
In s’dit qu’cha pourrot faire ein’ belle trappe à coulons
Pour parler d’ses caveux ch’est simpe à expliquer
I’sont drus comme des porions qu’in n’a pon arpiqués
Grand dijeux bafouilleux i’est surtout tiot faijeux
Es lanque alle s’ra usée qu’ses bras s’ront cor tout neus
Au refrain