LES MAINS D’DOPHINE
Paroles de Jean-Marie CERF
Musique de Simon COLLIEZ
Quand alle étot tiote file, aveuc ses longues mains fines,
Alle aurot sûr’mint pu juer du piano Dophine,
Mais dins ches années-là, comme les copines de s’nâche,
Sitôt finie l’école, alle s’artreuve au criblache,
Et ses mains ed pianisse sont dev’nues mains d’trieusse,
Machuquées, crevassées, in hiver souvint bleusses,
Dophine a quitté l’fosse du jour qu’alle s’a marié ;
D’pis qu’i’étot galibot es n’homme l’avot z’yeutée .
Alle attrape vite tros gosses, ch’est pon eine mince affaire :
Toudis d’bout el première, toudis couquée l’dernière.
Et arv’leusse comme alle est, pour rind’ sin nid bénache.
Ses mains d’fimme ed mineur sont toudis à l’ouvrache.
Pour s’occuper de s’n’homme, de s’mason, d’ses infants,
Comme alle a fauque deux mains, cha li prind tout sin temps.
El peu d’répit qu’alle a, ch’est pour racommoder,
Rapiéch’ter, flamiquer, rar’mint pour voisiner.
Quand l’soir est arrivé et qu’alle est bin réhue,
D’avoir ouvré tout l’jour ses dogts n’in peut’té pus
Ches années ont passé ; dins l’mason d’pinsionné,
Achtheure qu’i’a moins d’ouvrache alle pourrot s’arposer.
Mais comme alle est mémère et bin sûr pleine d’amour,
Pour toute es tiot’ famile ch’est eine bouée d’secours.
Malgrè ses dogts doreux, tordus et arséqués,
Alle fait cor tout c’qu’alle peut pour ses chinq tiots bradés .
Sans rin dire à personne, Dophine alle est partie.
Ch’est d’vant ses mains croisées qu’j’ai r’vu défiler s’vie :
Eine vie pas toudis rose, eine vie ed dur labeur
Comme y’in n’a pus achteure, eine vie d’fimme ed mineur.
Touchant ses dogts tout frod, j’li ai dit l’cœur poché :
Merci Man-man Dophine, pou l’bonheur qu’t’as donné.