CHA CH'ETOT BON AVANT
Paroles et Musique de Simon COLLIEZ
Je m'souviens quand j'étos gosse in allot tous les jeudis
Juer aux indiens aux cow-boys tout autour et su ch'terril
In grimpot in déchindot ch'étot plusieurs fos comme cha
In marchot pas in courrot ch'est simpe in n'arrêtot pas
Aujourd'hui je n'pourros pus je n'veux même pas essayer
I faudrot app'ler l'SAMU que'j s'ros même pas à moitié
Même si j'arrivos in haut che s'rot avec gramint d'peine
Et du temps i m'in faudrot pour mi arprinte em' n'haleine
Mais grimper ch'étot bon à dix ans
Avec l'âche ch'est sûr que j'pourros pus
Si dins m'tête j'ai toudis mes dix ans
Y'a min corps qui veut mais qui peut pus
Etant jeune in s'artrouvot dins les repas ed famille
Fallot vire tout c'qu'in mingeot in n'étot pas difficile
In avot eune intrée froite et suivie d'eune intrée caute
Y'a qu'après l'plat principal qu'in faijot eune pétite pause
In attindant el fromache in avot el trou normand
In avot toudis de l'plache à croire qu'in étot gourmand
Je n's'ros même pas à moitié qui faudrot app'ler l'SAMU
Faudrot m'hospitaliser l'pieau d'min vinte alle s'rot tindue
Mais minger ch'étot bon à vingt ans
Avec l'âche ch'est sûr que j'pourros pus
Si dins m'tête j'ai toudis mes vingt ans
Y'a min corps qui veut mais qui peut pus
Je m'souviens qu'après l'mariache avec eune bande ed copains
In sortot el sam'di soir in rintrot au p'tit matin
In dormot jusqu'à midi l'diminche soir in r'comminchot
In oubliot que l'lundi fallot aller au boulot
Aujourd'hui quand j'sus d'sortie j'ai d'mau à récupérer
J'reste allongé dins min lit je m'lève même pas pour minger
Si j'passos eune journée d'pus j's'éros dins un triste état
I faudrot app'ler l'SAMU pour m'éviter el coma
Mais sortir ch'étot bon à trente ans
Avec l'âche ch'est sûr que j'pourros pus
Si dins m'tête j'ai toudis mes trente ans
Y'a min corps qui veut mais qui peut pus
Mais tout cha ch'étot y'a longtemps
Avec l'âche ch'est sûr qu'in pourrot pus
C'qu'in faijot à dix vingt ou trente ans
Y'a nou corps qui veut mais qui peut pus