DU QU' I SONT
Paroles de Guy DUBOIS
Musique de Simon COLLIEZ
Dù qu' i sont tout' s ches compagnies d' mineurs
Qui allotent d' sous terre faire ech' dur labeur
Au pic à l' riv' laine rassaquer ch' carbon
A l' abattache au herchache dù qu' i sont
Dù qu' i sont les mineurs du grand saquache
A l' bowette à front d' talle à l' accrochache
Méneux d' quévaux raccommodeux porions
Nous pères nous hardis taïons dù qu' i sont
Dù qu' i sont les rires d' ches filles à gaillettes
Oubliant leu peines pour einne amourette
Au moulinache ouvrant comme ches garchons
Nous lampistes et leus taillettes dù qu' i sont
REFRAIN:
Dù qu' i sont i vous d' mind' ront un jour vous gosses
Les souv' nirs d' ches gins qui allottent à l' fosse
Pus d' chevalets pus d' terrils pus d' corons
O vous lamint' rez aussi dù qu' i sont
Dù qu' i sont toutes ches compagnies d' mineurs
Porions galibots calins ingénieurs
Lampistes filles à gaillettes carrieux d' carbon
Nous terrils nous mollettes dis dù qu' i sont
Dù qu' i sont ches bonnes jonnes ed douze treize ans
Au fond pousseux d' barroux aux pieds in sang
Au jour trieux d' cailloux et d' bon carbon
Nous vaillants tiots galibots dù qu' i sont
Dù qu' i sont les Sainte Barbe et les ducasses
Les fiêtes ed' famille les guinces les fricasses
Loin d' ches grèv' s et d' ches accidints du fond
L' tarte à gros bord les canchons dù qu' i sont
Dù qu' i sont les viux corons d' ches mineurs
Dù qu' in partageot insanne les bonheurs
L' amitié s' trouvot su l' seul d' ches maisons
Les bons momints à ch' pignon dù qu' i sont
(au refrain)
I sont rintrés dins l' légende ed nou sièque
A l' fosse nous pères ont souffert ont péri
Leurs dures misères méritent qu' in les respecte
Conservons leurs chevalets et leurs terrils