EL 4 DECEMPE
1 Paroles de Jean-Marie CERF
2 Musique de Simon COLLIEZ
Comme tous les jones de s’n’âche, i’a c’minché galibot :
Ch’est dins s’quinzième année qu’i’a dévalé dins ch’tro.
I’a dévalé dins ch’tro comme l’avot fait sin père
Et pindant trente chinq ans i’a eu les mêmes misères.
I’a eu les mêmes misères, chelles ed tous ches mineurs ;
Pus d’eun’ fos par d’zous terre i’a vu v’nir s’dernière heure.
I’a vu v’nir s’dernière heure, mais s’i sin est sorti,
Sin corps i’a té meurtri tout au fond d’ches gal’ries.
Tout au fond d’ches gal’ries, el poussière avalée
A miné ses poumons : i’a té silicosé.
I’a té silicosé, et d’pus qu’i’est pinsionné,
I fait de l’peine à vir : i n’peut pus respirer.
I n’peut pus respirer, i souf’ comme un martyr.
Ch’étot pourtant un dur, mais… i d’mind’ à partir.
I deminde à partir …sin vœu s’ra exaucé :
I’est mort… el quat’ décempe, comme par un fait exprès .
Comme par un fait exprès, Sainte Barbe l’a soulagé ;
Alle s’étot bin souv’nue qu’i l’a toudis fêtée.
Il l’a toudis fêtée ; s’patronne i l’adorot.
Alle l’a tiré d’affaire pus d’eun’ fos au boulot.
Pus d’eun’ fos au boulot , i’a sorti de s’musette
Pour li faire eun’ grosse baisse eun’ belle tiote statuette,
Eun’ belle tiote statuette qui n’l’a jamais quitté ;
I dijot… « avec elle , i faudra m’interrer » ; !
I’a été interré selon ses volontés :
Sainte Barbe est su sin cœur, ch’est pour l’éternité.