Sur min dernier terril

SU MIN DERNIER TERRIL Paroles de Isaïe LAMPIN Musique de Simon COLLIEZ Tout in haut d’min terril ,berché par tout un vint Dù qu’seu un gris mouchon vient cor i faire pourrette Su tout min mont d’caillaux, su z’och’mints d’un creus’mint Du qu’ches pleuves et pis l’sueur i’ont tracé des voïettes Su un dernier querelle, su l’calvaire ed tant d’gins J’ai mis un g’nou dins l’terre , j’ai inl’vé m’vielle casquette Tout un haut d’min terril, balloté par el vint Dù qu’un méchant cardon l’agréminte d’einn’ fleurette Su deux sieques ed carbon, l’chimetière d’un gis’mint Su un live qui s’arfreume su ches resses d’einn’ boxette Su min dernier coup d’oeul, su deux chints ans d’tourmints J’ai mis un g’nou dins l’terre , j’ai inl’vé m’vielle casquette Tout un haut d’min terril, es’coué par el vint Dù qué l’neiche vient i mette sin blanc capieau su s’tête Su tous ches viux corons, dins leus neux z’abil’mints Su deux reules sans fichelle, un barou sans gaïette Su einn’tour misérape, sans othieus dins ses mains J’ai mis un g’nou dins l’terre, j’ai inl’vé m’vielle casquette REFRAIN : Su min dernier terril, su min noir monumint Dù qu’tant d’bras i’ont trimé, par einn’ parelle conquête Pour tous nou brafes mineurs, pour min père,nou parints Pour ches noms su ches crox, là écrits in grantes lettes Su ch’tro d’fosse armuché par einn’ dalle in chimint J’ai mis un g’nou dins l’terre, j’ai inl’vé m’vielle casquette Tout in haut d’min terril, écherv’lé par el vint Dù qu’un coulon bien mate i treufe einn’ appoïette Pour min tiot galibot dormant cor su l’quémin Su l’malette rapiechée muchant ch’pain d’alouette Su l’caf’tière sans chirloute; su un fu qui s’éteint J’ai mis un g’nou dins l’terre, j’ai inl’vé vielle casquette Tout in haut d’mint terril, imbrassé par el vint Dù qu’un bos écrampi, vient i s’mer des équettes Su ch’lavabo sans loques, ech caudron sans béguin Su einn’ lampe qui s’indort su ches gnons d’einn’ barrette Su l’sainte barpe sans bistoulle, el quinzaine sans argint J’ai mis un g’nou dins l’terre, j’ai inl’vé m’vielle casquette (au refrain)