EL SOUHAIT D’UN FANTÔME NOIR
Paroles de Jean-Marie CERF
Musique de Simon COLLIEZ
Quand in rêve ed fantôme, in a des grandes frayeurs.
Mais ch’ti qu’j’ai vu l’nuit chi n’m’a vraimint pas fait peur :
Ses pieds n’traînot’ pas d’chaînes, i n’portot pas d’drap blanc ;
Rhabillé d’loques ed fosse, i’étot noir comme un fouan.
Ch’tot l’fantôme d’un mineur qui f’geot s’première sortie,
Ed pis d’pus chinquante ans qu’i étot aux oublis.
I voulot r’vir ech coin dù qu’i’a toudis vécu,
Mais i r’connaîchot rin et i cachot perdu.
« Ti qui es de ch’coron, dis-me ch’qu’alles sont dev’nues
Ches deux pompes qui d’min temps donnot’ de l’ieau à l’rue
In a modernisé et dins tous ches foyers,
Ed pis pas mal d’années, l’ieau in l’a su ch’l’évier
Mais i n’y’a pus d’gardin intre ches pavillons ;
A quoi qu’cha peut servir ches cubes in rang d’ognons ?
Ch’est des suites ed garaches car tout l’monte a s’n’auto ;
L’gardinache vous savez, cha n’est pus ch’que ch’étot !
J’n’arrêt’ pas pas d’métonner : je n’vos pas d’coulombiers,
Alors qu’i’a tant d’perchoirs alintour d’ches qu’minées !
Cha braf’ fantôme, ch’est d’z’antennes ed télévisions.
A ch’t’heure el cinéma I’est dins toutes ches maisons .
L’paysache i’a bougé ? Min terri j’l’artreuve pus ;
J’l’aperchuvot d’ichi, i s’dréchot vers l’bon diu
Ches milliers d’tonnes ed schistes, in les a étalés
Pour faire eune autoroute au mitan d’ches camps d’blé !
Ej sus tout in foufelle, cha qu’minche à m’contrarier :
J’n’ai pourtant pas l’bleusse vue ,mais l’chevalet du qu’i’est ?
I’a été condamné sans rin avoir fait d’mal ;
Rétalé, cisaillé, i’est parti à l’ferral’ !
Alors in n’déchind pus, vu qu’i n’y a pus d’molettes ?
Des mineurs i’in a pus ? in armonte pus d’gaillettes ?
El carbon ch’est fini, ches fosses in n’in pale pus !
Mais faut vous r’met’ min braf’, j’vos des larmes plein vou z’yux !
Réchuyant es niflette, i f’geot del peine à vir.
Té vos min tiot qu’i m’dit, j’n’aros pas dû r’vénir ;
L’progrès i’a té trop vite, i’a tué min passé,
Et j’ai peur qu’ches mineurs seuch’té vite oubliés !
J’artourne dins m’nunivers artreuver mes souv’nirs.
Mais j’voudros faire un vœu juste avant d’arpartir :
Qu’in raconte à ches jones l’histoire ed ches Gueules Noires,
Euss’ qui mérite tant d’rester dins ches mémoires.
Là d’sus i’a disparu et je m’sus réveillé.
Mais ch’qu’i venot de m’dire m’avot turlupiné !
Pour répond’ à sin souhait, je m’sus mis à l’ouvrache,
Et v’là pourquoi mes gins j’ai écrit chelle tiote pache.