CH'EST NOUS LES ROIS DU TIERCE
Paroles de René Douniaux
Musique de Simon Colliez
Y'a gramint ed'gins qui jutent au tiercé
In rêvant ed toucher el gros paquet
El plupart parie n'importe commint
Mais mi ech'fais tout cha méthodiqu'mint
Quel poids fait l'jockey commint i'est l'terrain
Si i fait bieau si pleut si y'a du vint
Ed père in fils nous autes in s'y connot
Faut dire qu'min père i'étot méneux d'quévaux
REFRAIN
Ch'est bin nous aut' les rois du tiercé
Chaque fos qu'in jue in est sûrs ed gagner
Scientifiqu'mint in fait nos pronostics
In connot tout sur le milieu hippique
Les noms des qu'vaux et ceux qui montent ed d'sus
Y'a pas d'secret pour nous el P M U
El pognon qui ch'est qui va l'impocher
Ch'est bien nous autes les rois du tiercé
Em' belle mère jue toudis s'date ed naissance
Ch'est p'tête pour cha qu'alle a pas gramint d'chance
Alle n'a jamais cangé ed numéro
I doivent avoir cent ans chés pauv' quévaux
Tous les chiffes de s'carte d'identité
Ch'est cha que m'femme alle se sert pour parier
I n'a jamais un seul qu'i'est arrivé
A m'mote que s'carte alle dot ête périmée
au refrain
Quand j'ravise les courses à l'télévision
Personne n'a l'drot ed parler à l'maison
Ej' sus aux premières loges dins min fauteul
Ej vos déjà grossir min portefeul
Mais j'décante souvint après l'arrivée
Et y'a m'bonne femme qui s'impresse d'ajouter
Pas la peine d'acater un coffre fort
A m'mote que tes quévaux i courent incore
au refrain