NOU TERRE ALLE TOURNE PUS ROND
Paroles de Jean-Marie CERF
Musique de Simon COLLIEZ
Ed’ pus inne paire d’années el météo bat d’l’aile
Un jour i fait bieau temps l’lind’mint i quet des grêles
In dit qu’y’a pus d’saisons n’y’a qu’el calindrier
Pour rapp’ler qu’ch’est l’hiver quand in s’crot in été
Y’a pont inne zique ed neiche pour chés fêtes d’fin d’année
Chés tiots n’ont pu l’plaisi d’glicher su ch’marais g’lé
Par cont’ au momint d’ Pâques in vind des marrons cauds
Faut mett’ sin passe-montane rinfiler sin mantieau
Chés bull’tins météo sont d’pus in pus tragiques
Des morts des disparus cha devient dramatique
Flux d’Ouest et oraches timpêtes et dépressions
Cha r’vient régulièr’mint dins chés informations
Un cyclone vient d’passer in annonche inne tornat’
Chés tots sont involés chés gins i s’barricat’
Aveuc tout l’ieau qui quet des villaches sont noïés
Là dù qu’y’a des torrents ch’est tout qu’i-est importé
Refrain
El temps n’est pus comme avant
Nou terre alle tourne pus rond
El temps n’est pus comme avant
Nou terre alle tourne pus rond
In n’sait pus dù aller pour treuver du solel
A vir el carte ed France ch’est tout partout parel
Si in part in été faut prind’ des loques d’hiver
Et n’import’-dù qu’in seuche faut avoir es’n’imper
Ach’t’heure déchind’ dins l’Sud cha peut êt’ fort risqué
Y’a des fos du verglas su l’prom’nate des Inglais
Des pinsionnés du Nord partis y faire bronzette
Sont arvénus tout pâles réchuyant leu niflette
Au refrain
Dins l’temps si l’météo annonchot el sam’di
Vingt chinq degrés à l’ompe Diminche après midi
In pouvot tranquill’mint sortir ech’ barbecue
Pour faire cha aujourd’hui faut êt’ un molé fou
Y’a toudis un cop d’vint i faut s’mett’ au rados
Avant qu’inne bonne drachée nous dégringole su l’dos
In s’énerfe in bertonne l’apéro s’éternisse
Final’mint ch’t’à l’païelle qu’in fait cuire chés saucisses
Au refrain