CANG’MINT D’EPOQUE
Paroles de Jean-Marie CERF
Musique de Simon COLLIEZ
D’pis vingt ans, ein’à ein’, chés fosses all’ z’ont freumé.
Faudrot t’i tourner l’pache, tourner l’dos au passé ?
Surtout pas mes brav’ gins ! mais faut bin l’constater :
Tout duch’mint mais sûr’mint nou viux pays minier
I prind un nouviau qu’min ; chés gins, leu façons d’faire,
Chés mots, chés paysaches, tout est in train d’s’arfaire.
Fini chés gouttes ed jus mon del voisine d’in face,
El tarte à libouli quand ch’tot l’jour del ducasse ;
Fini chés cafougnettes racontées su l’querpion,
Cacoules et comméraches féjant l’tour de ch’coron.
D’nou jours chés gins s’infreument, à l’coïette d’vant l’télé ;
I s’pal’té pu gramint… cang’mint d’mentalité
Cang’mint d’mentalité
REFRAIN
Aussi faut rind’ hommache à cheux qui aveuc cœur,
Défindent el patrimoine et l’culture d’chés mineurs,
In parlant cor patois, in euvrant des musées,
In gardant précieus’mint terrils et chevalets,
Aussi faut rind’ hommache à cheux qui aveuc cœur,
Défindent el patrimoine et l’culture d’chés mineurs,
In fêtant cor Sain’ne Barpe aveuc plein d’émotion,
Pour n’jamais oublier ch’qu’étot l’corporation.
J’intinds des mots achteure, dù qu’ch’est qu’in va les querre ?
Comme ‘E-mail’, ‘pokémon’, ‘cyberpoint,’ ‘fax’, ‘booster’…
Mais pu personne en’ pale ed boulot, ed gaïette,
Ed briquet, ed barette, ou bin d’pain d’alouette.
Ch’est des mots qu’in n’dit pu passe- qu’i n’ont pu d’usache,
Et chés mots qu’in n’dit pu… ch’est la fin d’nou parlache.
Quand l’dernier fiu d’mineur là-haut buqu’ra à l’porte,
Qu’nou patois s’ra sûr’mint devenu ein’ lanque morte,
Quand in aura vu l’bout ed tous chés grands chantiers
In train d’canger l’visache ed l’ex bassin minier,
Là … l’pache al s’ra tournée… i faut s’faire ein’ raison ;
Faut pas s’délaminter…ch’est cha l’évolution .
Ch’est cha l’évolution.
Au refrain