MEME DICAMINT
Paroles de Jean-Marie LEFEVRE
Musique de Simon COLLIEZ
Em’ mère alle a très souvint quette cosse qui cloche
Et sin méd’cin i li donne des tas d’trait’mints
J’artreuf’ bien souvint des cachets dins ses poches
Ou des gélules qui sont queutes sur ech’ divan
Aussi min garchon qu’i’a querre es’ moquer d’elle
D’un drôle ed surnom v’là ti pas qu’il l’appelle
Au lieu d’i dire simplemint bonjour mémé
Ach’t’heure i li dit plutôt bonjour mémé « dicamint »
REFRAIN
Mémé dicamint Mémé dicamint
Ach’t’heure tout l’monte l’appelle comme cha
Ch’est qu’alle in prind à tour de bras
Des médicamints des médicamints
Alle a un grand calendrier
Sur eulquel alle a tout marqué « sérieus’mint »
Mais tout cha cha n’dot pas l’impêcher d’aller
In bus pour faire des voyaches organisés
Alors i faut dire à ch’docteur ed passer
Pour que ses ordonnances alles seuchent arnouvl’ées
Pour tout c’qu’alle a, i faut bien trente six cachets
Des jaunes des rouches des mitans pis des intiers
Des gouttes et pis des gelules multicolores
Et ses temesta surtout pour qu’alle s’indort « tranquill’mint »
Quand j’arrife avec em’ feulle chez ch’pharmacien
I rigole i sait qu’je l’dérinche pas pour rien
Faut de l’pomate pour soigner ses hémoroïtes
Pourvu qu’i s’dépèche mi j’voudros qu’cha aille vite
Cha pour l’diabète et pis cha pour ses ognons
Pour l’arthros’ et cha pour ses palpitations
Pour sin glaucom’ alle met des gouttes dins ses yux
In n’est pas prêt d’arboucher l’trou d’la sécu « ch’est certain »